|
Bir zaman ola ki nesl-i ademi bula fena
Sulb-i Haydar'dan gele ecsada ruh ile bula beka
Nesl-i Haydar müfredatı cem'u terkib eyleye
Müfredat ola mürekkeb ruh ile bula beka
Her devirlerde mürekkeb ola ruh-ı müfredat
Tavr-ı insâna bu tarza eyleyeler ibtida
Devr-i evvelde cihan teribi olan müfredat
Haşr-i kübrada olurlar ruh ile hep aşina
Ruh ile her birisi bir türlü etvar göstere
Esfeli terk eyleyip bir bir bulalar i'tila
Seb'-i etvar ile hayvan mülkünü seyr edeler
Devr edip bir meratib nutk ile bula safa
Lik vardır ''redd-i esfel'' bazısına sureta
siret ile suretine yine eyler irtika
Hep tabayı 'mecma'ıdır her maadinle nebat
Müfredata raci' olmak anlara olmak gıda
Bil ki bu terkib-i insân cümleyi cami'durur
Suretine sireti tatbik ise olmaz ceza
Suretine sıretin tatbıka sa'y et ey aziz
Arz-ı hal et mühr-i tatbik ura kalbe evliya
Ehl-i irşaddır bu demde kalbini pak eyleyen
Damenini dutmaz isen devr edersin kahkara
Mülk-i insân heşt menzildir hakikat şehrine
Çalış imdi menzilin itmama aşık bi-riya
Hanedan-ı Mustafa varislerine bende ol
Anlara mahsus hidayet hem şefaat taliba
Ol güruh-ı nazenine mülhak olmazsan eğer
Menzilinden reddolursun gayrı yoktur mülteca
Fırsatın elde iken tut damenin bir mürşidin
Dest-gir olsa olursun mülhak-ı al-i aba
Bilmeyip bu ehl-i irşad halini münkir olan
Kahkariyyen devr ile hayvana can eyler feda
Çok zaman hayvani hil'atlar giye öz nefsine
Hırs ile dam-ı beladan bulmaya ol hiç reha
Kalb-i mürşidden olursa her kime atf-ı nazar
Gönlüne dahil olar zatına eder iktida
Hanedana eyleyen Ammar-veş canın feda
Ehl-i beyte ola mülhak ''ircii'' ere nida
Dinler isen hoş maarif söyleyem pek dikkat et
Kimse bu sırdan haber vermiş değildir taliba
Arza nisbet ebhurun mahluku nice rütbedir
Bir semeklerdir tuyurat anda yok subh u mesa
Üç tabayi' üzre terkib evveli bahrilerin
Her birini Çar unsur ede tahrike seza
Tohm ile zahir olur tavr-ı semek birine bin
Birbirin eyler gıda yoktur birinde hubb-ı ca
Safilinin esfelidir cins-i bahri cümleten
Hilkati esfel deminden misl-i Mervan daima
Bed nefisten olduğuyçün bunların hilkatleri
Bu'd-ı insânda taayyüş etmeğe ol mübtela
Nefs-i magzubun deminden olanın ekli haram
Cürm u isyandan olur hep nev' ile hut-ı fena
Daima mahluk-ı bahrin evveline kıl nazar
Ma'deni etvar ile yoktur birinde dest ü pa
Yine ma'dendir gıdası bak aceb hizmettedir
Bir değirmedir ki bunlar taşı eyler aynı ma
Her devirde bahr-i rahmet ehl-i şirki gark eder
Hıfz-ı suret eyledi kürside hayy-ı Kibriya
Her biri bahrin fenasıyla giyer cin hil'atin
Bu devirle devr eder hep safilin-i eşkıya
Arz-ı bahri mesken ede her birisi bunların
Nice menzilden geçe hem bi-hem ü bi-neva
Pay-ı çille seyr ederken çar-paya nalk edip
Çar erkan ile ahır seyr ede şehr ü kura
Çar pada heft nev'dir bir enva'ı yedi
Anın için bil yedidir pute-i nar-ı laza
Katil-i eşca yedidir nev'-i hayvanide hem
Pençesi var her birinin arkasında post kaba
Muzi-i mühlik yedidir tohm ile eyler zuhur
Her biri yerler içinde eylemiştir ihtifa
Nev'-i hayvandan yedidir ademe olan gıda
Tırnağı kim iki şaktır azı dişi olmaya
Ef'i kec tayyar-1 katil pençesi var seb'adır
Sireti zahid münafık bulmamışlardır hüda
Pençesi kattal olanlar nefsine mağlub olan
Muzinin içi hıyanet hükm-i vesvas masiva
Nice bin kez devr ederse bulmaya biri felah
Hanedan-ı Mustafa'dan olmayınca pişiva
Bu kasidem müntehinin sohbetiyle fehm olur
Mübtedilerden sakın kim attırırsın taşı ha
Üsküdarlı Haşim Baba
13:02 - 7.10.2007 -
|